Се враќа делумната забрана за движење во шуми, целосната забрана останува само за Македонски Брод и Чашка
Дата на објава: 
15 Август 2017

Според првичните податоци од Јавното претпријатие Македонски шуми, овој месец се регистрирани 56 пожари, а опожарени се 4.000 хектари. Од овие пожари, досега е завршена постапката за 22 пожари, од кои што штетата е околу 1 милион евра. Првичните анализи покажуваат дека дел од пожарите се подметнати, а дел се предизвикани од невнимание. Министерството за внатрешни работи, веќе има поднесено кривични пријави против две лица, посебен извешај за едно лице и записиници за две лица, поради постоење сомнение дека сториле кривично дело „предизвикување шумски пожари“ во регионот на Македонски Брод.


Средба на министерот Љупчо Николовски со амбасадорот на Соединетите Американски Држави, Џес Бејли
Дата на објава: 
14 Август 2017

Министерот за земјоделство, шумарство и водостопанство Љупчо  Николовски, денеска оствари средба со амбасадорот на Соединетите Американски Држави, Џес Бејли. На средбата присуствуваше и директорот на техничката канцеларија на УСАИД, Едвард Гонзалес. На средбата се разговараше за моменталната состојба со шумските пожари и за мерките што ги презема Министерството за земјоделство,шумарство и водостопанство но и другите надлежни институции за справување со пожарите. Амбасадорот Џес Бејли, изрази интерес за меѓуинституционалната координација во справувањето со вакви кризни состојби како што се пожарите.


За два месеци исплатени 50 милиони евра, до крајот на месецот целосна реализација на субвенциите
Дата на објава: 
14 Август 2017

Министерот за земјоделство, шумарство и водостопанство Љупчо Николовски, информираше дека за два месеци се исплатени околу 50 милиони евра субвенции за земјоделството. За реализација остануваат неполни 15 милиони, за кои решенијата се веќе подготвени. До крајот на месецот се очекува поддршката да биде префлрена во целост, информираше денеска министерот за земјоделсво,шумарство и водостопанство, Љупчо Николовски.

Во однос на преостанатите 15 милиони евра, министерот рече дека се работи за субвенции за земјоделци кај кои контролите покажале несовпаѓање на пријавеното со состојбата на терен.

-Оние производители кои поради некоја причина нема да добијат субвенции, да се обратат до Платежната агенција за да се детектира проблемот и да се надмине, изјави Николовски и најави дека Министерството ќе воспостави систем на навремена исплата.

Минисерот Николовски, информираше и дека до крајот на годината, до 31 декември, ќе бидат исплатени и дополнителните шест милиони евра поддршка, за млад земјоделец и за подигање нови повеќегодишни насади.


МЗШВ работи со полн капацитет, министерот е на своето работно место, будно се следи состојбата со пожарите
Дата на објава: 
13 Август 2017

Министерството за земјоделство, шумарство и водостопанство активно презема мерки и со полн капацитет ги извршува обврските за справување со пожарите. Министерот за земјоделство, шумарство и водостопанство Љупчо Николовски е на своето работно место и e посветен на извршување на обврските во соработка со сите надлежни институции за справување со пожарите и превенција од појава на нови пожари.

Според последните информации од Центарот за управување со кризи, најголем дел од пожарите кои беа активни се изгаснати. Пред околу час и половина е локализиран и пожарот кај Крушево. Активни,  но ставени под контрола и без опасност за ширење се пожарите во близина на манастирот Трескавец и населените места Мажучиште, Мараморани и Горно Село, кај селата  Крушевица и Бонче, селото Никодин,  и пожарот на м.в.Фрлогоец (Женска планина) на Бистра Планина.

Координативното тело за кризна состојба во која член е заменик-министерот за земјоделство Власте Димковиќ, секојдневно одржуваат состаноци, на кои се даваат насоки и наредби за справување со пожарите.


Преглед на мерки преземени од МЗШВ за справување со пожарите
Дата на објава: 
11 Август 2017

Министерството за земјоделство шумарство и водостопанство активно презема мерки за заштита на шумите од појава на пожарите.

Согласно Законот за шуми, по барање на ЈП Македонски шуми на 11.07.2017 година, Министерот за земјоделство, шумарство и водостопанство Љупчо Николовски, даде согласност за делумна забрана за движење во шумата или во одделни нејзини делови, во период од 15.07.2017 година до 15.08.2017 година.

Оваа одлука од страна на МЗШВ е донесена пред да отпочне сезоната на шумските пожари. Меѓутоа по активирањето на поголемиот број на шумски пожари низ целата територија на  Република Македонија, Министерот Николовски, на ден 05.08.2017 година даде согласност за целосна забрана за движење во шумите или во одделни нејзини делови за периодот 05.08.2017 година до нејзино отповикување.

Владата на РМ во согласност со Законот за управување со кризи донесе одлука за постоење на кризна состојба заради превенција и справување со пожарите на подрачјата Македонски Брод и Чашка, од 5.08.2017 година.


Syndicate content