Укинатата царинска давачка за увоз на замрзнато свинско месо ќе ја зголеми конкурентноста на месната индустрија
Дата на објава: 
9 Мај 2018
logo mzsv 1.png

Владата на вчерашната седница ја усвои одлуката за времено укинување на увозната давачка-специфичната и царинската стапка по вредност за замрзнато свинско месо и други производи од свинско.
Оваа одлука е привремена и ќе важи до 15.11.2018 година, а количините се утврдени на ниво од 50% од утврдените потреби за суровини на домашната индустрија, од страна на Стопанската комора на Република Македонија, Групацијата за производство на месо и преработки од месо, врз основа на фактурираната и наплатена реализација во претходната година.
Укинувањето на царинската стапка за замрзнато свинско месо и други производи од свинско ќе овозможи да се зголеми извозната конкурентност на домашната индустрија за производство на преработки од месо, што ќе влијае на зголемување на обемот на производство, извозот и искористеноста на капацитетите и зголемување на бројот на вработени во домашната индустрија за месо.


Од следната недела започнува исплатата на субвенциите за тутунот од реколтата 2017
Дата на објава: 
8 Мај 2018
logo mzsv 1.png

Денеска во Служен весник се објавија измените и дополнувањата на Законот за земјоделство и рурален развој.
Дел од измените на овој закон предвидуваат одложување на важноста на условите за подмирени обврски кон Управата за јавни приходи, што изминатите години беше пречка за исплата на субвенциите.
Со оваа измена се создаваат законски услови за навремена исплата на субвенциите, меѓу кои е и исплатата на субвенциите за тутунот од реколтата 2017. Во насока на навремена исплата на субвенциите за тутунот,од денеска до крајот на оваа недела Платежната агенција ќе ги спроведе законските контроли во откупните претпријатија, по што ќе следува обработка на решенијата за исплата на субвенциите за тутунот.
Исплата ќе започне следната недела. Според податоците, зголемени субвенции за тутунот од реколтата 2017 ќе добијат над 23.400 тутунари.


Земјоделците од Ранковце ќе добијат современ систем за наводнување,од Славишко поле започнува проектот за еколошки систeм
Дата на објава: 
4 Мај 2018
Ran3.jpg

Министерот за земјоделство шумарство и водостопанство Љупчо Николовски со претстaвниците од Делегацијата на Европската унија денеска ја посети општина Ранковце, една од локациите за спроведување на проектот „Мали нискотрошковни, еколошки прифатливи системи за наводнување“. Во оваа општина, станува збор за системот за наводнување на Славишко поле, кој што е од исклучително значење за наводнување на земјоделските површини во оваа општина. Според првичните анализи, изградбата на овој систем за наводнување ќе чини околу 1,6 милиони евра, а средствата се веќе обезбедени од програмата ИПА 2015.

Тековниот систем за наводнување во Славишко Поле се состои од привремен зафат на Крива Река, со кој што се наводнуваат до 40 хектри. Новиот систем ќе овозможи наводнување на 200 хектари и ќе донесе придобивки за повеќе од 250 домаќинства кои се занимаваат со земјоделство во Ранковце, Гиновце и Псача.


ФАО го објави повикот за интерес за изработка на Физибилити студии за консолидација на земјоделското земјиште
Дата на објава: 
3 Мај 2018
logo_mzsv.png

Организацијата за храна и земјоделство на ОбединетитеНации (ФАО), го објави повикот за изразување на интерес за учество на тендер за консултантски услуги за “Физибилити студии за консолидација на земјиште во 12 консолидациони области во Македонија”. Физибилити студиите треба да ја покажат оправданоста на спроведување на консолидацијата на земјоделското земјиште во претходно идентификуваните 12 потенцијални области низ државата.
Објавувањето на јавниот повик е во рамките на проектот финансиран од Европската унија “Воведување на национална програма за консолидација на земјиште” (MAINLAND) кој го спроведува ФАО заедно со Министерството за земјоделство, шумарство и водостопанство.
Со огласот се покануваат сите овластени геодетски компании кои се заинтересирани да земат учество во престојниот тендер да достават изјави за интерес според насоките и барањата дадени на следниот линк:https://www.ungm.org/Public/Notice/71062. Рокот за доставување на изјавите за интерес е 07 мај 2018 година.


Донесени и изменети пет закони во интерес на земјоделците
Дата на објава: 
3 Мај 2018
logo_mzsv.png

Собранието усвои измени и дополни на пет закони во областа на земјоделството. Станува збор за законите за земјоделство и рурален развој, за ловство, за рибарство и аквакултура, за консолидација на земјоделско земјиште и за семенски и саден материјал за растенија. Сите овие измени на закони се од исклучително значење за развојот на земјоделството, а од кои главна придобивка ќе имаат земјоделците.
Со измената и дополнувањето на Законот за земјоделско земјиште, законски се официјализира воведувањето на мерката за кофинансирање на трошоците за набавка на гориво за земјоделска механизација. Над 54.000 земјоделски стопанства кои имаат евидентирано земјоделски површини во Единствениот регистар на земјоделски стопанства во МЗШВ, ќе имаат поевтино гориво за механизацијата. Со мерката драстично ќе се намалат производствените трошоци, што е еден условите за поконкурентно производство. На овој начин во земјоделството остануваат над пет милиони евра.


Syndicate content