Министерството за земјоделство, шумарство и водостопанство ги потсетува сите земјоделци дека во тек е аплицирањето за дополнителните директни плаќања од програмата за финансиска поддршка во земјоделството за 2023 година.

Напоменуваме дека крајниот рок за поднесување на барањата е до 25 декември 2023 година.  

Како корисници кај мерката 1.3 се јавуват земјоделски стопанства корисници на подмерката 1.1 „Директни плаќања по обработлива земјоделска површина за сите поледелски култури, лековити, ароматични и зачински растенија, освен за тутун”, кои имаат засеани и ожнеани површини со пченица, јачмен, сончоглед, маслодајна репка и афион и оствареното производство го имаат продадено во преработувачки капацитети, вклучително и за потребите на сопствениот преработувачки капацитет, запишани во Регистарот на откупувачи на земјоделски производи.

Денеска, претседателот на Владата на Република Северна Македонија, Димитар Ковачевски, заедно со министерот за земјоделство, шумарство и водостопанство Љупчо Николовски, државниот секретар Реџаил Исмили, директорот на Платежната агенција Никица Бачовски и заменик директорот Ремзи Абдулахи, доделија 206 договори во вредност од 1.5 милиони евра за модернизација на земјоделските стопанства преку мерката „Бизнис План“ од Програмата за рурален развој за 2023 година..  

„Мерката „Бизнис План“ ја воведовме за прв пат оваа година, а денес ја финализираме со бројки за почит, со што оваа мерка се покажа како една од најдобрите, најпотребните или народски кажано полн погодок. Сме успеале да допреме до сржта на очекувањата на земјоделците, да им го дадеме токму тоа што го сакаат и што им треба. Впрочем така започна оваа успешна приказна, ние рековме ајде да креираме нова мерка, потполно различна како ниедна друга до сега и да им дадеме можност на земјоделците самите да кажат и да одберат што им треба. Не ние да им кажуваме за што да аплицираат, туку тие самите да си одберат какова опрема им треба за да го развиваат производството. И токму тука лежи успехот“ посочи министерот Николовски.

„Бизнис План“ е нова мерка која за прв пат стартуваше оваа година преку јавен повик кој беше објавен на 10.05.2023 година. По обработката на податоците, Платежната агенција одобри 206 апликации кои во целост ги исполнуваат условите.

Собранието на Република Северна Македонија го усвои законот за дивечот и ловството. Станува збор за рефромски закон со многубројни новости и законско решение усогласено со регулативите на Европската Унија.

Со донесувањето на овој закон се излегува од досегашните концесиски рамки, бидејќи дивечот како таков е делумно обновлив ресурс, па во иднина дивечот се предвидува да се дава на користење и управување, наместо на концесија како што беше досегашното законско решение, и тоа на период до 20 години. Ваквата измена е во насока на трајноста во одгледувањето, заштитата и неговото користење.

Министерството за земјоделство, шумарство и водостопанство ги потсетува земјоделците дека во тек е јавниот повик за доставување на барања за користење на средства од Програмата за финансиска поддршка на руралниот развој за 2023 година, за мерката 121 Инвестиции за модернизација на земјоделски стопанства, односно подмерка 121.12 Набавка на комбајни за жито.

Крајниот рок за доставување на барањата е до 30 декември 2023 година. Заинтересираните земјоделци своите барања ги поднесуваат електронски по извршена регистрација на e-baranje.ipardpa.gov.mk.

Кај овој јавен повик како корисници се јавуваат земјоделски стопанства запишани во Единствениот регистар на земјоделски стопанства во МЗШВ, согласно Законот за земјоделство и рурален развој, и поседуваат минимум 10 хектари обработлива земјоделска површина под пченица, јачмен, р`ж, тритикале и/или овес.

Собранието на Република Северна Македонија го усвои Законот за советодавни услуги во земјоделството и руралниот развој, предлог на министерството за земјоделство, шумарство и водостопанство. Значајна реформа која придонесува за уште поголема поддршка во развојот на македонското земјоделство и руралните заедници.

Преку овој закон за советодавни услуги, создаваме можност за професионализација на советодавните услуги, воспоставувајќи систем, преку кој на земјоделците директно им се доближат знаењето, вештините и искуствата за најновите практики и технологии што се применуваат во земјоделското производство, а кои директно треба да влијаат во тоа да како држава имаме одржливо и конкурентно земјоделско производство, по европски терк.